Nú er nóg komið!

Gott fólk, þetta getur ekki viðgengist lengur!

"Að" og "Af" eru ekki eitt og sama orðið, og það er ekki flókið að nota þessi orð rétt! Í fyrsta lagi er alveg ótrúlegt magn af fólki sem "leitar af" einhverju eða einhverjum. Þetta er algerlega út úr kú nema viðkomandi standi á þessum einstaklingi. Þú getur ekki leitað af td. Magnúsi nema þú sitjir eða standir á honum. Þú getur hins vegar sagt "ég leita af" ef setningin er td.: "Ég leita af landi brott" eða "ég leita af mér allan grun".

Næsta dæmi(og þetta er af mbl.is, nota bene!): íslenska ungmennalandsliðið tapaði fyrir ítölum, 0-1. Svo í greininni stóð um markið, að þar hefði einhver leikmaður Fiorentina verið "af" verki. hvað í ósköpunum þýðir það? Mér er skapi næst að skilja það sem svo að hann hafi einn leikmanna ekki komið nálægt markaskoruninni. Hvernig fær maður (eða kona) með svona takmarkaða íslenskukunnáttu vinnu á stærsta fréttablaði landsins? Gera þeir virkilega engar kröfur um nám eða kunnáttu? Raunar er íþróttakunnátta sumra sem skrifa í íþróttahluta blaðsins svo léleg að það er ekki einu sinni hlægilegt! Fyrir um það bil ári síðan fann ég fimm staðreyndavillur í smáfréttunum, sem voru líklega um tuttuguogfimm talsins.

Nú ætla ég ekki að segja að ég sé einhver snillingur, en ég veit mínu viti þegar kemur að íþróttum, og finnst blóðugt að vera neyddur til að leita á erlend mið til að fá traustverðugar íþróttafréttir.

Þetta er komið nóg í bili, nú vona ég bara að greinaskilin skili sér betur en í fyrstu færslunni. Ég þoli ekki að lesa texta þar sem engin eru greinaskilin, þetta verður eins og grautur...

Athugasemdir

[Þórdís Inga Þórarinsdóttir (IP-tala skráð) 3.9.2006 kl. 16:58]

Þér varð ekki AÐ ósk þinni, greinaskilin bara virka ekki ef maður notar Opera vafrann. Annars er ég þér algjörlega sammála þó manni verði auðvitað stundum á og mismæli sig, en slíkt er ekki ritskoðað svo að það er í lagi!